
大寶伏藏TD504བཀའ་བརྒྱད་བདེ་གཤེགས་འདུས་པའི་བརྒྱུད་འདེབས་ནི༔ ༔ བཀའ་བརྒྱད་བདེར་འདུས། བརྒྱུད་འདེབས།
14-25-1a
༄༅། །བཀའ་བརྒྱད་བདེ་གཤེགས་འདུས་པ་ལས༔ ཁྱད་པར་གནད་ཀྱི་རྫོགས་རིམ་ལྔ་བཞུགས་སོ༔ ༔ བཀའ་བརྒྱད་བདེར་འདུས། བརྒྱུད་འདེབས།
༄༅། །བཀའ་བརྒྱད་བདེ་གཤེགས་འདུས་པའི་བརྒྱུད་འདེབས་ནི། །ཁྱབ་བདག་སྟོན་པ་ཀུན་བཟང་ཆེ་བའི་མཆོག །རྡོ་རྗེ་སེམས་དཔའ་ཞི་ཁྲོ་བཀའ་བརྒྱད་ལྷ། །རྡོ་རྗེ་འཆང་དབང་ཤཱཀ་ཐུབ་དགའ་རབ་ལ། །གསོལ་བ་འདེབས་སོ་དབང་བསྡུར་བྱིན་གྱིས་རློབས། །གསང་ཆེན་བཀའ་ཡི་སྡུད་པོ་རྡོ་རྗེ་ཆོས། །མཁའ་འགྲོའི་གཙོ་མོ་ལས་ཀྱི་དབང་མོ་ཆེ། །སྐལ་ལྡན་མཆོག་རབ་ཨིནྡྲ་བྷཱུ་ཏི་ལ། །གསོལ་བ༴ མི་སློབ་ཟུང་འཇུག་མངོན་གྱུར་ཤྲཱི་སིཾ་ཧ། །བདེ་ཆིན་སྒྱུ་མའི་གར་མཁན་གོམས། །ཛམ་གླིང་རྒྱན་མཆོག་དཔལ་གྱི་རིག་འཛིན་བརྒྱད། །གསོལ་བ༴ རབ་འབྱམས་རྒྱལ་ཀུན་ངོ་བོ་པདྨ་འབྱུང་། །གངས་ཅན་བསྟན་པའི་ཉིན་བྱེད་གྲུབ་ཆེན་བརྒྱད། །ཆོས་རྒྱལ་ཚངས་པ་ལྷ་ཡི་མེ་ཏོག་ལ། །གསོལ་བ༴ ཟབ་གཏེར་བསྟན་པའི་སྤྱི་མེས་མངའ་བདག་ཉང་། །མཁའ་མཉམ་འགྲོ་བའི་མགོན་པོ་ནམ་མཁའི་དཔལ། །སྙིང་པོའི་དོན་གཟིགས་བློ་ལྡན་ཤེས་རབ་ཞབས། །གསོལ་བ༴ མཐུ་སྟོབས་བརྟུལ་ཞུགས་མཐར་ཕྱིན་བདུད་འདུལ་མཚན། །སྒྲོལ་མས་རྗེས་བཟུང་མདོ་སྡེ་སེང་གེ་དང་། །མཁས་གྲུབ་ཟླ་མེད་པདྨ་དངོས་གྲུབ་ལ། །གསོལ་བ༴ འཇམ་དཔལ་གྲུབ་པའི་དཔའ་བོ་ནོར་བུའི་མཚན། །འཇིག་རྟེན་དབང་ཕྱུག་ཀུན་དགའ་རྒྱལ་མཚན་དཔལ། །གྲུབ་པའི་རིག་འཛིན་ཉང་སྟོན་ནོང་བུ་འཕེལ། །གསོལ་བ༴ ཕན 
14-25-1b
བདེས་ཀུན་ཏུ་དགའ་བའི་འོད་ཟེར་ཅན། །འཁྲུལ་ཞིག་རྗེ་རིགས་ནམ་མཁའི་རྣལ་འབྱོར་པ། །གནས་ལྔ་རིག་པའི་པཎ་ཆེན་པདྨ་དབང་། །གསོལ་བ༴ ལྷ་སྲས་རྣམ་རོལ་རིན་ཆེན་ཕུན་ཚོགས་ཞབས། །གར་དབང་ཡེ་ཤེས་མཆོག་གི་རོལ་པ་རྩལ། །བློ་གྲོས་མཆོག་གིས་བསྟན་པའི་རྒྱལ་མཚན་འཛིན། །གསོལ་བ༴ གཞན་ཕན་ཕྲིན་ལས་མཐར་ཕྱིན་རྡོ་རྗེ་འཛིན། །གར་དབང་མགོན་པོ་ཕྲིན་ལས་ལྷུན་གྲུབ་དང་། །པདྨ་གར་དབང་འགྱུར་མེད་རྡོ་རྗེ་ལ། །གསོལ་བ༴ ཕྲིན་ལས་གྲུབ་བའི་རྡོ་རྗེ་འགྲོ་འདུལ་རྩལ། །ཧཱུྃ་མཛད་རོལ་པ་རྡོ་རྗེའི་གཏེར་མཛོད་འཛིན། །དབང་བཞིའི་རྒྱལ་མཚན་མཛེས་པའི་རྡོ་རྗེའི་ཏོག །གསོལ་བ༴ བསམ་གཏན་རྒྱ་མཚོར་ཡེ་ཤེས་རིན་ཆེན་འཕེལ། །ཀུན་བཟང་གདུང་འཚོབ་ཕྲིན་ལས་ལྷུན་གྱིས་གྲུབ། །ངེས་དོན་ཆོས་ཀྱི་སྲིད་སྐྱོང་གར་གྱི་དབང་། །གསོལ་བ༴ [ཁ་སྐོང་ཤློཀ་གཉིས་གུ་ཎས་སོ། །]དཀྱིལ་འཁོར་རྒྱ་མཚོའི་མངའ་བདག་ཆོས་ཀྱི་རྗེ། །སྨིན་གྲོལ་གདམས་པའི་བདུད་རྩི་མཆོག་སྦྱིན་མཁན། །བཀའ་དྲིན་མཉམ་མེད་རྩ་བརྒྱུད་བླ་མ་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཕྱི་དཀྱིལ་སྨིན་བྱེད་ལམ་གྱིས་ལྷ་སྐུར་ཤར། །ལུས་དཀྱིལ་དབང་གིས་རྩ་ཁམས་བདེ་དྲོད་འབར། །ཕྱག་རྒྱ་ལ་བརྟེན་དགའ་བཞིའི་ཡེ་ཤེས་རྟོགས། །རང་སེམས་ཀ་དག་ཀུན་བཟང་མངོན་གྱུར་ཤོག །[ཅེས་རྒྱལ་ཁམས་པ་འགྱུར་མེད་རྡོ་རྗེས་སོ།། །།]



